BAM Construction
BAM Construction - Digwyddiad Cwrdd â'r Prynwr
![Bam construction Bam construction](/media/2278/bam3_v_Variation_2.jpg)
‘Mae'r digwyddiad gyda BAM Construction yn
enghraifft wych o sut gall y Cyngor weithio gyda'r byd diwydiant i
greu cyfleoedd masnachu ar gyfer busnesau lleol yn yr
ardal.’ Meddai Gordon Andrews, Pennaeth
Datblygiad Economaidd Cyngor Castell-nedd Port Talbot.
Mae amrywiaeth eang o fanteision i ymgysylltu â chwmnïau lleol,
gan gynnwys gwybodaeth leol, pobl leol a chefnogaeth ar gyfer yr
economi leol wrth leihau ein hôl troed carbon. Maent hefyd yn helpu
BAM i gefnogi polisïau'r cyngor lleol ar gyfer caffael cynaliadwy a
lleol. Wrth i BAM Western ehangu yn Ne Cymru, roedd datblygu
perthnasoedd ag is-gontractwyr a chyflenwyr lleol yn
flaenoriaeth.
Bu BAM yn cyfarfod â Swyddogion Cefnogi Busnes Cyngor
Castell-nedd Port Talbot i drafod y ffordd orau o ymgysylltu â
chwmnïau lleol. Cytunwyd y byddai ‘Diwrnod Cwrdd â'r Prynwr’ yn
fuddiol tu hwnt. Gan fanteisio ar wybodaeth y Cyngor am fusnesau
bach a chanolig (BBaCh) ledled yr ardal leol, daeth yn glir bod
cryn ddiddordeb yn y digwyddiad.
![Bam and NPT Council Bam and NPT Council](/media/2277/bam1_v_Variation_3.jpg)
Darparwyd rhestr o fasnachau a chyflenwyr targed ynghyd â'r
gofynion ar gyfer gweithio gyda BAM ynglŷn â safonau iechyd a
diogelwch, amgylcheddol a chyflogaeth. Roedd y masnachau'n
adlewyrchu'r rhaglen gaffael ar gyfer y prosiect ysgol lleol a
ddechreuwyd yn ddiweddar a hefyd pecynnau gwaith nodweddiadol.
Trefnodd BAM ddigwyddiad mewn ystafell gynadledda mewn gwesty
lleol gan greu mannau trafod unigol mewn amgylchedd hamddenol.
Roedd gan bob cwmni a oedd wedi cofrestru gyda'r cyngor lleol
ymlaen llaw slotiau hanner awr i hyrwyddo eu busnesau i reolwr BAM
a oedd yn gallu gwneud penderfyniad ar eu haddasrwydd a chadarnhau
neu wrthod y cyfle i dendro ar y prosiect lleol neu gofrestru ar
gadwyn gyflenwi BAM ar gyfer cyfleoedd yn y dyfodol.
I gefnogi'r is-gontractwyr yr oedd angen mwy o gymorth arnynt i
gyrraedd y safon ofynnol, roedd BAM a sefydliadau megis Construct
Wales, Workways Employment ac Adran Cefnogi Busnesau'r Cyngor wrth
law i asesu gofynion busnesau ac amlygu cyfleoedd hyfforddi.
![Bam Construction Bam Construction](/media/2279/bam4_v_Variation_2.jpg)
Daeth chwe deg cwmni i ddiwrnod y prynwyr a gynhaliwyd ar 28
Mawrth 2011. Ychwanegwyd 75% o'r cwmnïau hyn at gronfa ddata cadwyn
gyflenwi BAM a gwahoddwyd 55% ohonynt i dendro am fwy na 30 pecyn
am brosiect ysgol lleol. Mae'r adborth a'r canlyniadau'n dangos
effaith gadarnhaol y diwrnod yn glir.
Yn dilyn y digwyddiad, cafodd yr anghenion hyfforddi lleol eu
gwerthuso a'u blaenoriaethu. Trefnodd Cyngor Castell-nedd Port
Talbot weithdai hyfforddi lleol i sicrhau bod y cwmnïau'n bodloni'r
safonau gofynnol. Trwy drefnu sesiynau grŵp, roedd y Cyngor yn
gallu lleihau cost y gweithdai, a wnaeth yr hyfforddiant yn opsiwn
fforddiadwy i'r cwmnïau llai. Bydd yr hyfforddiant yn helpu i
sicrhau bod y cwmnïau'n addas i gystadlu am dendrau adeiladu yn y
dyfodol.
"Dyrennir i bob cyflenwr 20-30 munud gyda
chynrychiolydd prynwr, ac mewn rhai achosion mwy o amser na hynny.
Mae hyn yn galluogi trafodaeth ystyrlon ac o ganlyniad, mae'r
cwmnïau'n cael gwybodaeth fwy manwl am ofynion y prynwr, gan
gynnwys achrediadau gorfodol. Yn yr achos dan sylw, caniataodd
hefyd i'r cyflenwyr unigol esbonio'r hyn sydd ganddynt i'w gynnig i
BAM Construction Ltd. Yn gyffredinol, dyma oedd ymagwedd at
gyflwyno cyflenwr lleol i brynwr a gafodd groeso da a'i gyflawni'n
dda. Os pennir llwyddiant yn ôl barn y cyflenwyr o'r digwyddiad,
yna dengys y graff isod, a dynnwyd o arolwg o'r cwmnïau cyflenwi
lleol ar ddiwedd y digwyddiad, y cafodd groeso da iawn a'i
werthfawrogi'n fawr." Lynne Davies, Adeiladu
Cymru