Cultech Ltd

Cultech Ltd

Mae cwmni uwch-dechnoleg gyda fformiwla llwyddiant wedi creu 25 swydd ar ôl ennill contract sylweddol gydag un o gewri'r stryd fawr.

Mae Cultech, cwmni biodechnoleg ym Maglan, yn cynhyrchu'r dewis Dome Cap o 22 ychwanegyn maethol i'w gwerthu yn siopau Boots ledled y DU.

Cefnogwyd codi cyfleusterau cynhyrchu newydd i'w ategu gan Lywodraeth Cymru trwy'i Chronfa Buddsoddiad Sengl.

Cynyddodd trosiant y cwmni £3 miliwn y llynedd i fynd yn fwy na £12 miliwn ac erbyn hyn mae'n cyflogi mwy na 150 o bobl mewn unedau gweithgynhyrchu ym Mharc Diwydiannol Baglan a Maesteg.

Dywedodd Nigel Plummer, y rheolwr-gyfarwyddwr, y bu cymorth Llywodraeth Cymru'n hollbwysig. Ychwanegodd, "Nid oeddem wedi gallu bwrw ymlaen gyda rhai prosiectau ymchwil heb gymorth grantiau. O ganlyniad i hyn, bu modd i'r cwmni dyfu'n llawer cynt na buasai'n bosib fel arall, ac rydym yn ddiolchgar iawn am y cymorth hwn."

Dywedodd Mr Plummer fod Cultech yn gweithredu mewn marchnad tra chystadleuol ond ei fod wedi parhau i dyfu trwy ddarparu arbenigedd penodol ar gyfer creu fformwleiddiadau cymhleth mewn ymateb i'r galw gan gwsmeriaid.

O ganlyniad, mae wedi arallgyfeirio a symud i segmentau marchnad newydd gan allforio i Ogledd America, Ewrop a'r Dwyrain Pell, ymhlith lleoedd eraill.

Dywedodd Ieuan Wyn Jones, y Gweinidog dros yr Economi a Thrafnidiaeth, fod Cultech yn chwaraewr pwysig yn y sector gofal iechyd a bio-wyddoniaeth yng Nghymru.

"Mae bob amser yn dda clywed am gwmnïau sy'n ehangu ac yn creu swyddi, yn enwedig yn yr hinsawdd economaidd sydd ohoni," meddai.