Paratoi am gyfweliad
13. Paratoi am gyfweliad
Cyn y
diwrnod
Mae'n bwysig creu argraff dda. Mae eich
CV/ffurflen gais wedi gwneud hyn eisoes. Dyma'ch cyfle i fynd â hyn
gam ymhellach drwy ddilyn yr awgrymiadau isod:
- Ffoniwch i gadarnhau y byddwch yn bresennol
ar yr amser a'r dyddiad a gynigiwyd.
- Gofynnwch pa fath o gyfweliad byddwch yn ei
gael. A fydd yn sgwrs gyfeillgar neu'n gyfweliad mwy ffurfiol? A
fydd rhaid i chi sefyll prawf?
- Gofynnwch am ddisgrifiad swydd, copïau o
unrhyw gyhoeddiadau busnes neu brosbectws.
- Gwnewch ragor o ymchwil i'r cwmni.
- Gwnewch yn siŵr bod cyfeiriad llawn lleoliad
y cyfweliad gennych a chyfeiriadau i'w gyrraedd fel y gallwch
gynllunio'ch taith. Weithiau mae'n syniad da ymarfer y daith.
- Gwnewch restr o'r cwestiynau yr hoffech eu
gofyn yn ystod y cyfweliad.
- Gofynnwch i'ch partner neu ffrind ymarfer y
cyfweliad gyda chi. Os yw hyn yn achosi embaras, gofynnwch iddynt o
leiaf edrych ar eich rhestr o gwestiynau.
- Ydy'r dillad rydych yn bwriadu eu gwisgo'n
lân ac yn daclus ac yn briodol ar gyfer cyfweliad? Mae'n well
gwisgo'n rhy ffurfiol nag yn rhy anffurfiol.
- Rhowch hwb i'ch hyder drwy ddarllen eich
CV/ffurflen gais. Wedi'r cwbl dyma'r rheswm maent wedi cynnig
cyfweliad i chi.
- Paratowch eich portffolio i fynd ag ef gyda
chi; copi o'r llythyr yn eich gwahodd i'r cyfweliad, eich CV neu
gopi o'r ffurflen gais a anfonwyd gennych, unrhyw dystysgrifau neu
drwyddedau perthnasol a'r ymchwil rydych wedi'i gwneud.
Ar y
diwrnod
Dyma'r amser i sicrhau bod eich holl waith
caled hyd yn hyn yn dwyn ffrwyth. Gyda'ch portffolio wrth law, eich
cwestiynau'n barod a'ch cynlluniau teithio wedi'u trefnu, dyma'ch
cyfle i'ch paratoi eich hun cystal ag y gallwch.
- Beth i'w wisgo, beth na ddylech ei wisgo. Ar
ôl i chi ymchwilio i'r math o sefydliad sy'n rhoi cyfweliad i chi,
dylech chi wybod beth yw ei gôd gwisg. Beth bynnag rydych yn ei
wisgo, gwnewch yn siŵr eich bod yn edrych yn smart ac yn barod i
fod yn aelod o'r tîm. Yn ogystal â chreu argraff dda, bydd hyn yn
sicrhau eich bod yn teimlo'n gartrefol. Gwiriwch eich gwallt, eich
ewinedd a'ch esgidiau.
- Byddwch yn broffesiynol ac yn ymwybodol o'ch
ymddygiad o'r eiliad rydych yn gadael y tŷ. Wrth gyrraedd lleoliad
y cyfweliad, cyflwynwch eich hun yn gwrtais i'r derbynnydd.
Dywedwch pam rydych chi yno a phwy rydych wedi dod i'w weld.
Cyfeiriwch at y llythyr gwahoddiad yn eich portffolio.
- Os gofynnir i chi aros, defnyddiwch yr amser
i ddysgu mwy am yr amgylchedd. A oes gwybodaeth wrth law megis
posteri, taflenni neu adroddiadau? Gwyliwch bobl sy'n cyrraedd ac
yn gadael. Am beth maent yn siarad a sut maent yn ymddwyn?
I ddechrau chwilio am swydd, edrychwch ar Becyn Swyddi
Gweithffyrdd: